上海咖啡馆中国咖啡网

咖啡，勿单单是公认个一种饮料，外加还是仅次于石油、可以辣辣世界市场浪合法买卖个期货。因历史个原因，欧美辣阿拉国民心目中一直为时髦发达个标志，所以当咖啡一进入上海滩，再加上本身成本高昂，价钿自然勿菲。要论咖啡垃中国最普及个城市我想应该是上海。上海人向来喜欢赶时髦、别苗头、扎台型，所以吃咖啡与其讲是一种口舌享受，勿如讲是一种生活方式搭市场个标记，并逐步发展成一种优雅时尚城市生活个符号，咖啡馆也因此拨拉广泛应用到城市硬件建筑之中。可以提升整条马路个时尚指数搭文化氛围。旧上海个霞飞路(现淮海路)和静安寺路(现南京西路)之所以垃拉上海地图浪风景这边独好，就搭咖啡馆个密集有相当关系。光想想伊拉个名字――Hot Chocolate(沙利文)、DDS(甜甜丝)、Rosemary、 Mars(东海)、Jimmy(吉美)、Philadelphia(飞达)、老大昌、凯司令、康生咾啥，好比夜空中闪闪繁星装饰了一个喧闹多彩个都市。

咖啡馆派生出一道最绚丽个文化色彩就是具有异国风情温馨浪漫。但是要辣辣老上海站住脚，哪怕最时尚、最摩登个咖啡馆也要根据勿同个服务对象搭环境打勿同个牌。老上海咖啡馆一般分为两大类，一类是商务行政型个，像位于大马路(南京东路)的Mars(东海)、德大，因四周洋行银行密集，所以店堂个布置侧重敞亮方正，比较硬气，有利于公司与客户个接待。中央商场个Jimmy(吉美)辣笔者印象里向，面积勿大，但原木白柸个卡座，用碱水刷得雪白洁净。咖啡杯是一种白底蓝边个粗瓷，同时还供应三明治、热狗之类个简餐，完全为了方便周边工作个白领午餐。吉美一直开到“文化大革命”，伊拉个草莓冰淇淋至今令我齿舌留香……

而到了称为上海时尚地标个静安寺路，电影院、夜总会、舞厅遍布四周，是情侣搭时髦人最中意个地方。搿搭个咖啡馆当然要极力营造一种温馨浪漫个氛围。可惜我养得晏【晚、迟】了几年，无缘感受到老海派咖啡馆个氛围，幸亏还来得及看到伊拉远远逝去个背影。

海派文化个精髓就在于以最低个成本推出最有特点个精致。咖啡馆个本意辣辣国外就是单售咖啡、茶以及简单个点心。不过到了上海，或许出于店铺租金个昂贵，当然还有消费者个需要，一般老上海咖啡馆侪搭西餐合二为一，集门市外卖，包括糖果、饼干、曲奇糕点、午茶、冰淇淋于一身个多元经营。为了竞争，除了咖啡外，还形成了每家咖啡馆各自个拳头产品，如老大昌个拿破仑蛋糕、凯司令个栗子蛋糕、沙利文个牛茶鸡茶、天鹅阁个奶油鸡丝焗面、东海个柠檬派、吉美个草莓冰淇淋、飞达个鸡卷、起士林颗粒饱满又浓又香个浓味咖啡糖……相比之下，虽然今朝上海咖啡馆遍布各处，但除了红宝石个奶油小方之外，侬还能想起搿些咖啡馆有哪些特色个糕点小吃呢?讲穿了只勿过是星巴克个翻版，而勿是Made in Shanghai个风味。

咖啡种类交关多，但其实就分两大类：欧式搭美式。老上海往往流行喝香而浓个欧式咖啡。随着咖啡个普及搭美式文化个抢滩，特别是1938年雀巢速溶咖啡个问世，二次大战胜利后，上海年轻人开始爱上了香而淡、量偏大(用马克杯)个美式咖啡。假使呒没记错，吉美就是抗战前上海较少个一家比较典型个美式咖啡馆。

吉美辣上海有两家，一家辣辣中央商场，另外一家辣辣四川路。讲起来四川路搿家吉美还是沿马路个，又敞亮，位置比中央商场里向个好。但正应了商家个一条铁律“地段、地段、还是地段”，四川路搿家就是做勿过中央商场。

转载请注明出处。

2014-08-18 12:12:01